la boç de l pobo

Este bideo ye para bós comantar...

2010-11-21T09:41:00.004Z

L suonho fai destas cousas!

Fiestas an honra de Nuossa Senhora de l Naso

2010-09-01T11:06:00.004+01:00

Pruoba, 6, 7 e 8 de Setembre de 2010

6 de Setembre - Feira de ls Burros

20h Procisson Pruoba/Naso i Missa

21h30 Baile cun l grupo "Costa Verde"

7 de Setembre - Feira de Anho

13h30 Missa ne l Santuário

Animação cun grupo de gueiteiros

21h30 Baile cun l grupo "Graffite"

8 de Setembre

14h Missa ne l Santuário

Concerto cun la banda de Miranda

Animaçon de rue cun " Amigos do Vitó"

20h30 Beile cun ls grupos "Norte Music" i "Função Públika"

00h30 Fogo de artifício

Liçones de caixa

2010-07-08T09:27:00.003+01:00

Home de la Pruoba tantando ansinar un aprandiç a tocar la caixa.
Pula maneira cumo sbolácia debe ser un antandido no assunto, ou será "al-bino"!
Será... será...
Cun ganas si l pega!

Arrebanha uossos

2010-06-27T10:08:00.003+01:00

Pegando ne l ditado popular, "An tiempo de guerra nun se lhimpan armas." i ponendo-lo ne ls tiempos d'hoije, tiempos de crise, an que se diç que ye perciso apertar l cinto, la Boç de l Pobo arriscarie a traduzi-lo para:

- An tiempos de crise arrebanhan-se ls uossos.

I eiqui tenemos ua eimaije que mostra isso mesmo, dous rapazes bien pimpones l zafio a ber qual ye l que arrebanha más uossos. Fui ua lhuita mie eigual quedando ne l final, ampatados.

Hai no antanto que dar a saber que ls uossos ya staban arrabanhados, ya era portanto la sigunda buolta. Até ruobien las unhas!

L que tchegarenos...

Nuoba moda

2010-06-02T16:04:00.003+01:00

Agora cun la aprobaçon de ls casamentos antre pesonas de l mesmo sexo, humm... nun sei nó!

I se la moda pega!?

Mirai i comantai...

Bida de Pauliteiro

2010-03-25T09:53:00.007Z

Toda la gente que ben a la Tierra de Miranda gusta de ber ls Pauliteiros i pensa que ls bai ancuntrar na rue, asi cumo quien bai a un café i pide un copo de bino!

Las cousas nun son bien assi, la bida de Pauliteiro nun ye fáçil!

Se la própria actuaçon ye cansatiba, la nuite anterior nun ye melhor, porque son feitos alguns eixercícios que só eilhes saban: ansaios, palotadas, lhebantamento de copos... podemos dezir que ye un stágio para se purpararan.

Hai que tener purparaçan física para aguantar...

Se a este ya le sirbe ua atrelado, imaginai se apanha un scanho!

L atrelado nun se cai.

Lucky Luke

2010-03-06T10:06:00.004Z

Fui feita ua grande çcuobierta ne ls últimos dies...

Lucky Luke, herói de ls lhibricos de banda desenhada que todos nós nos lambramos, ten familia na Pruoba!

Bós mirai pa ls retratos i dezi que nun son bien parecidos...

Pareçan mielgos!

Nuobas culturas

2010-01-02T10:00:00.003Z

Tenendo an cuonta que cada beç hai menos huortas cultibadas, grande parte deilhas ampeçam a quedar a l'abandono, l San Pedro resulbiu dar um pequeinho ançantibo.

Cun las anchenas de ls últimos dies, todas las huortas a la borda de la ribeira quedoram alhagadas.

Nun sabemos se toda la gente antandiu la ajuda de l San Pedro, mas, para aqueilhes çtraidos...

Cun tanta auga...

I que tal sumiar arroç!

Pescador pescado

2009-11-14T10:14:00.003Z

Normalmente, quando alguien bai a la pesca, ye para pescar... mas nin simpre ye assi, i tenemos eiqui la proba, ne l retrato.

Questuma-se dezir: "el si hai animales bien spiertos..." i si ye bien berdade, bos mirai que até ls peixes fintoran l pescador!

Bendo que l'home staba çtraído cumbinoran todos i ala, arrepiçoran-le la canha, i l'home, cuitado, alhá tubo que ir l meio de la lhagona atrás deilha...

Que remédio tubo...

Bandeira çconhecida

2009-09-29T10:54:00.004+01:00

La maior parte de las antidades públicas i até mesmo pribadas, tenan a la puorta uns fierros a l'alto que son para puner alhá las bandeiras. Tenendo uas más ou menos fierros que outras, cunsuante las bandeiras a puner alhá.

Neste caso, na Pruoba, hai 4: un pa la bandeira europeia, outro pa la de Portugal, outro pa la de l cunceilho i por último la de la freguesie, sendo puostas pula mesma ordem.

Hai eiqui ua tamporada atrás, aparciu alhá puosta ua outra bandeira que ye çconhecida de l pobo, tenie um formato squesito.

La gente anda toda meio alborotada: será que hai ua bandeira nuoba!?, haberá que poner outro fierro!?, qual será l sou dezideiro!?

L pobo anda çcunfiado, assustado até...

Haberá algum grupo radical ne l lhugar!?

"Simplex" l çerbicio de la agricultura

2009-09-23T11:52:00.005+01:00

Ne ls últimos anhos, muito se ten modernizado i tenendo an cuonta alguns puntos de bista, tamien se ten çimplificado alguas cousas.

Fui cun esse oubjectivo que l goberno criou l programa "Simplex".

Fuoran façlitados çerbiços na anternet que assi mos poupam deslocaçones, tiempo de espera i mos dan comudidade.

Assi cumo noutras áreas se aplicou esse programa, tamien ls agricultores tubieran d'ancuntrar la melhor maneira de l'adoptar...

Assi, para quei andar cun las canhonas a pie se se puode andar de trator!?

La maleita de l suonho

2009-05-06T14:43:00.004+01:00

Ne l últimos dies ten-se falado muito an nuobos bírus i outras cousas ruins que nun bal la pena lambrar.

A las bezes oubimos falar na talbisão que hai isto i aquilo e nós dezimos: isto ye só pur ende, parqui nun tchega, nós eiqui stamos guardados de l resto de l mundo.

Nun será bien assi!

Essas poderan nun benir i speremos bien que nó mas ya hai acá outras que deixam assi la gente cun ua cara...

Nunca se biu ua cousa assi, ye que só ataca ne ls cafés!

Será de l fumo!?

Será de las buidas!?

Até agora inda nun se sabe, mas...

Será... Será...

Rebuliço de las ties

2009-03-24T10:10:00.004Z

Pus si, quien dirie, las ties de la Pruoba faziram grebe!

Cumo agora esta cousa de las grebes stá tanto na moda: grebe pur isto, grebe pur aquilo, tamien las ties de la Pruoba faziram ua.

I anton qual ye l motibo? - perguntais bós!

Ora anton, estando eilhas anraibadas i rebultadas por tener que star santadas ne ls puiales a la praça de casa, ou anton a la nuite quedar santadas l redor de l lhume, anquanto ls tius ban pa la casa de l pobo a jogar las cartas, resulbiran rebultar-se.

Assi, i olhai que nun ye cousa buona, uas ya tchegoran a ir a las tantas de la nuite a saber de ls tius a la casa de l pobo, outras deixoran-ls a dormir na rue, i, habendo aqueilhas más redicales, deixoram ls tius an casa i fuoram eilhas pal casino a botar ua cartada!

La cousa stá séria, purparai-bos!

Ya agora tenei cuidado! Pus toca a todos...

Quando l suonho aperta

2009-03-17T09:56:00.002Z

L suonho si debe ser ua cousa bien fuorte, quando ataca de berdade qualquiera cama sirbe...

Pouco sirbe fazer um sforço, mudar de pouson ou arregalar bien ls uolhos, ou até mesmo que haba muito barulho.

Quando ten que ser... ye!

Fui l que l passou a este rapaç. Cumo staba mie cansado e fartico de fazer "çporto", fui atacado pula moléstia de l fogareiro i eilhi quedou assi mie bien quetico.

Pouco serbiu la cama ser dura i la almofada inda pior, durmiu eilhi ua séstia que fui un regalo.

Ye caso para dezir: cada un deita-se na cama que fazir, i cumo este nun tubo tiempo, deitou-se na que ancuntrou...

La matância de l'anho

2009-02-17T10:09:00.004Z

Quaije todos ls anhos, pula altura de las matâncias, hai algo que cuntar... L cutchino que se scapa, un matancieiro que se cai, ou outra cousa qualquiera...

Este anho, hoube un cutchino que ganhou bida outra beç!

Buotoran-le la cuorda l çufino i gente an riba para l sigurar, spetoran-le la faca, passado un catchico l cuctchino perdiu la fuorça i, ya stantido ne l tchano, palha an riba para l tchamuscar.

Çerilha na mano para tchiçcar la palha i l'animal nun stubo cun meias medidas, alhebantou-se outra beç!

"tenie fogo ne l rabo..."

Bulbiran a agarra-lo i benga más ua facada. Cuitadico de l'animal nun tenie mesmo ganas de ser antchouriçado.

Será que tenie mesmo dues bidas!?

Purmeiro anibersário

2009-02-16T15:47:00.006Z

"la boç de l pobo" ne l sou purmeiro anho d'eisistência, ben assi desta maneira agradecer a todos ls colaboradores, leitores i amigos toda la fuorça transmitida.

A todos bós saudaçones mirandesas

Bós mirai... i comantai!

2009-02-10T10:49:00.001Z

Amigo Labrador...

2009-01-27T09:51:00.004Z

Abisan-se todos ls labradores de l Praino Mirandês que ne l passado mês de Dezembre abriu ne l lhugar de la Pruoba ua Clínica Beterinária.

Assi, quando tubirdes ua animal malo, ya sabeis! Fazan todo l tipo de tratamentos, desde sacar bitelos, tirar l'aire de l estômago, cumpuner las caçcanhetas, entre outros...

Mas hai que dezir que tenan ua cousa an que son specialistas e essa specialidade son las ouperaçones, bos bede que jeito l pegan, nin l'animal percisa d'ouxigénio...

I l purmenor de las batas! Isto quier dezir que son mesmo porfessionales...

Agora só fai falta arranjar un nome! se tubirdes algua ideia, ponei-la an comantário...

L perro mal arrés

2009-01-20T10:47:00.004Z

Ya ye dezideiro bielho quando se diç que perro que lhadra nun muorde (mas nin todos!)...

Quien dirie que este perrico tan pequeinho serie capaç de fazer tanto strago!?

El assi ne l retrato até parece bien sossegado todo ampimponado an riba de l bloco!

Pus, nin todo l que parece ye, e eiqui stá la proba. Este perro debe tener andado a ber muita talbisão, daquilhas reportaijes de ls assaltos a ouribesaries i outras cousas que tal.

Abandonado i bendo-se perdido na bida, resulbiu fazer ua cousa dessas mas a la moda del: antrou nun curral de pitas i benga a çtroçar, todo l que l mexie era para botar abaixo i nun l chegou ua nien dues, l todo fuoran dieç.

L pior bieno açpuis quando l'amo dou de cuonta, nun l deixou salir de l curral. Juntou-se el i más três ou quatro i benga la caça l perro, doram buoltas i mas buoltas, bardeiradas, puntapies i nada, nun eram capazes de l'agarrar. Por fim, ya quando nun puodie más, alhá l butoran la unha ponendo-lo an praça pública para que fuossa julgado.

L'amo de l perro nun se soubo quein era i quien quedou a mal fui l'amo de las pitas que quedou sin eilhas...

L prejudicado ye siempre l Zé Pobinho...

"la boç de l Pobo" i cumo esto se passou an tiempo de caça, piede a todos ls caçadores que nun abandonan ls perros i, se se perdiran, que fagam puls ancuntrar porque ua beç abandonados i chenos de fome... fazam destas cousas...

Moahmed Noites besita la Pruoba

2009-01-13T14:18:00.004Z

Este anho la Pruoba tubo ua besita que nun ye mie normal por estes lhados.

Sendo la Pruoba un lhugar onde l cunsumo de çarbeija nun ye de ls más baixos, nin pouco más ou menos, l mandante spiritual de ls LCOÇ ( Lhugares de Consumo Oubrigatório de Çarbeija), besitou la nuossa tierra.

Muahmed Noites bieno assi cun esta besita, premiar todo l sforço que se fizo para cuntinuar a fazer parte desse grupo, que por muito que ya se tenga buido, hai siempre lhugar para más um çmol.

I cumo mos portemos bien, atingindo la meta de un cierto consumo, Muahmed Noites atchou por bien renobar por más dieç anhos la licença LCOÇ.

La Pruoba agradece la destinçon...

Esta comantai-la bós...

2009-01-05T15:19:00.001Z

2008-12-22T11:42:00.000Z

Cumo stacionar

2008-12-22T10:14:00.006Z

Hai por ende sitios para stacionar ls automobles, daqueilhes que son perpendiculares l passeio, an que se mos çcuidar-mos i cumo la altura de l passeio ye tanta, lhougo l para-choques bate alhá.

Tenendo an cuonta esses pequeinhos "acidentes", "la boç de l pobo" resulbiu por buntade própria fazer un studo para ber de quien era la culpa: se de ls passeios, ou anton de ls cundutores.

Açpuis de muitas aberiguaçones i outras tantas mediçones, tchegou-se a ua cuncluson.

La culpa ye de ls condutores! Si, listes bien... la culpa ye mesmo de ls cundutores!

I porquei!?

Porque se todos ls cundotores fussan cuidadosos, cumo l de l'automoble de l retrato, ya nada disso acuntecie... naide batie ne l passeio...

Este automoble será miu!?

2008-12-16T10:22:00.003Z

Nesses automobles más antigos, i cumo alguas de las tchabes abram las puortas de ls outros de la mesma marca i modelo, hai que tener cuidado.

Imaginai que ides çtraidos i sin querer antrais noutro automoble que nun ye l buosso! Mirais pal lhado i dais de cuonta que nun ten las mesmas cousas que bós costumais tener alhá, meteis la tchabe pal puner andar mas nun pega, stá más lhimpo que l buosso, mas mesmo assi cuntinuais a anteimar que ye l buosso...

A ua dada altura aparece l bardadeiro amo/a (que por sinal ye un catcho maior que bós i ben acumpanhado/a), i bós naqueilhes purparos i siempre anteimando! Cumo bos zanrrascais?

"La boç de l pobo" ten l remédio: traei siempre ua almofada ne l talho de cundutor, i na mala la motoserra, la matchada i algua farramienta...

Assi, i antes de antrar nun automoble que pansais ser l buosso, procedei cuma na imaije, i falando cun ls buossos buotones:

Será que ye l miu!? Tenerá almofada!? I la motoserra, stará na mala!?

Delor d'unhas

2008-12-09T11:03:00.002Z

Stá a tchegar l'imbierno, cun el ampeçan a benir las geladas i cun eilhas l friu...

Ambora, ya nun seian tan frius cumo ls d'antigamente, mesmo assi inda tchega bien.

Quien nunca l'acunteciu andar cun las bacas ou cun las canhonas i tchegar a casa todo angaranhido!? Ya para nun falar quando se andaba a apanhar nabos, anton aí si se arrefecien las manos, que quaije nun se santien.

La gente, l que querie era tchegar a casa i calce-las l redor de l lhume, mas l pior benie açpuis, que quando las manos ampeçaban a calcer ampeçaban tamien las unhas a duoler i muitos de bós sabeis que nun duolien assi tan pouco! Até fazien arreganhar ls dientes...

Fui a pansar nessas pessonas que fuoram ambantadas uas nuobas lubas, que an beç taparam la mano toda, só tapam las unhas!

Assi ya nun se arrefeçan i cul choque térmico, tamien ya nun duolan...

El si hai cada cousa!!!

Sinalética para perros

2008-10-16T09:34:00.005+01:00

Pur muita lhiberdade que tengamos hai siempre regras que tenemos de respeitar, seian eilhas nun relacionamento pessoal, seia ne l die a die de caminantes pula rue.

Se amdubirmos de carro, tenemos que star atentos ls sinales de trânsito para nun fazer ningua tuntada, ou até mesmo se andubirmos a pie...

Assi cumo nós humanos, tamien ls animales, neste caso ls perros, ban a tener que respeitar las regras que fuoran ampuostas.

Na Rue de l Pçeiron fui lhançanda ua sinalética para perros.

L sinal ye ua garrafa ou garrafon de plástico tcheno d'auga i l sou significado ye: nun se puode mijar eiqui.

Cun esta sinalética, ls perros ficoran proibidos de mijar, nas puortas i fitas de las moscas, adonde haba este sinal, ou anton cuorran l risco de lhebar ua bardeirada.

Cumo bedes, an todo l lhado ten que haber regras...

Automoble amoutchado

2008-09-30T10:27:00.004+01:00

Cumo hoije an die se oube falar tanto an roubos de automobles dessa maneira de "car jacking" la gente de la Pruoba anda atormantada! Anda zapaçançiada!

Bós bede que hoube un home, que na biespra de l naso, até amoutchou l automoble cun yerbas i ramalhos para que esses bardinos nun l bissan... Até parece que ya adabinaba l que iba a acuntecer nesse mesmo die ya de madrugada... mas isso queda para outra beç.

Dezi alhá que nun quedou pinpon!!! Bei-se cun cada ua!!!

Caixota cun ruodas

2008-09-27T09:50:00.003+01:00

Caixotas hai-las de bárias quelores i marcas, seian eilhas burmeilhas, amariêlhas ou quelor de laranja, mas cun ruodas quaije nun hai ningua... nin cun santalho!

Dezimos quaije, porque só hai ua i pus claro tenie que ser na Pruoba, la purmeira an todo!

L'amo de l trator, cada beç que traiê un fardo desses redondos na caixota normal, las ruodas delantreiras benien quaije siempre ne l aire. Cumo nun querie fazer cumo l'outro que puso un çepo a fazer de cuntrapeso, resulbiu arranjar ua caixota cun ruodas i assi resulbiu l problema.

Agora só falta saber cumo bai a fazer para puner l rolo an riba...

Pur agora ya ten ocupante pal santalho, pareçan(i cun todo l respeito) aqueilhes dous ampregados de la câmara que andan naquel tratorico!

Nial ambulante

2008-09-16T09:58:00.004+01:00

Andan pur ende esses amigos de l'ambiente a dezir para respeitar la natureza i para nun anterferir ne l sou desambulbimento natural...

I quando ye la própria natureza a querer antegrar-se ne l mundo moderno!?

L que dezis d'un paixaro que fizo l nial nun trator!?

Si, ye berdade, un paixaro fizo l sou nial an riba de un trator i para onde iba l trator, iba l nial i la nuite quando l trator paraba, l paixarico tornaba para alhá...

- I perguntais bós: anton i ls uobos nun se arrefecien anquanto l trator andaba d'un lhado para outro sin l paixaro alhá?

Parece que nó porque ls uobos fuoran tchucados i las crias saliran i deban andar por ende a sbolaciar...

Segundo anformaçones a que la "boç de l pobo" tubo acesso, l paixaro i sues crias, gustoran de la nuoba speriência, pur isso pa l'anho tenei cuidado... imaginai que bos fazan l nial an riba de l santalho!!!

Cuntrapeso

2008-09-13T09:32:00.004+01:00

Nua altura an que l preço de l petróleo stá mie alto, i que por arrastamento fai chubir tamien l de l fierro, un home de l nuosso lhugar tubo de se baler cu'l que ancuntrou a la mano...

Tenendo ido el cun sou trator i sue caixota a buscar uma pouca de lheinha, si porque na caixota nun pudie carregar muita, çcuidou-se algo i carregou-la de más. Carregou uns çepos, más uas galhas i quando fui a lhebantar ls hidraulicos l trator lhebantaba-se na delantreira...

- I agora que bou you a fazer? - dezie el

Fui anton que se lambrou de puner un çepo pindurado cun uas cuordas na delantreira de l trator i assi alha chegou el cun la carrada a casa...

La carrada nun sei se serie mie grande... para um çepo seco serbir de cuntrapeso... nun sei!!!

Ls metalúrgicos que tengan cautela...

2008-08-20T14:31:00.000+01:00

Nuoba modalidade olímpica

2008-08-01T10:07:00.004+01:00

Nua altura an que stá quaije a ampeçar más ua eidiçon de ls Jogos Olímpicos, ne l nuosso lhugar fui çcobierta ua nuoba modalidade... i, l comité olímpico stá a pansar mie sériamente an poner-la cumo más ua modalidade!

Esta nuoba modalidade ten cumo palco de jogo ua atrelado cun grano, ls participantes botan um poulo para lhá, ganha aquel que ficar cun la cara más feia i, l cair, botar más granos fuora...

Queda eiqui l retrato de la purmeira praticante i recordista mundial...

L "milagre"

2008-07-26T09:31:00.003+01:00

Quando algua cousa que parece ampossible de se fazer, aparece feita, ou algo fuora de l normal acuntece, lhougo se diç ne l meio popular que se dou um "milagre"!!!

Fui isso l que acunteciu hai eiqui uns dies atrás... um home que dezie que nunca bebie çarbeija, i toda la gente sabe isso, i que só bebie Bacardi (i auga a la purmanhana), fizo ua apariçon ne l naso de çarbeija na mano quedando toda gente de boca abierta!!!

Será que se dou um "milagre"!?

L çportista de l'auga

2008-07-15T10:44:00.003+01:00

Toda la prática de çporto ye buona, seia eilha an tierra, n'auga ou até ne l aire.

Ne l que diç respeito a l'auga ya son conhecidos muitos çportos praticados. Nataçon, mergulho, canoaije, vela, surf i outros más... andar de barco, gaibota ou de mota d'auga...

Mas ua cousa que nunca se tenie bisto, era ua bicicleta de l'auga! Esta ye nuoba!!!

Se la moda pega nun ban a faltar praticantes an machide, nin an fuonte seca, ou até na lhagona de l drago...

Podie-le dar para pior..

L campo de la bola

2008-07-11T21:42:00.003+01:00

Todas las obras lhieban l sou tiempo a seran feitas, deçde l porjecto até l final.

La Sé de Miranda, obra reconhecida an toda la penínsola, tamien lhebou muitos anhos a ser feita i muitos homes deixoran alhá l sou suor.

Ne l lhugar de la Pruoba tamien hai ua obra que ya nun sei quantos anhos fui ampeçada i nunca más se bei l fim...

Deçde l çterro, até que se ampeçoran a fazer ls muros, passoram bien a buntade binte anhos! Nun quedeis admirados porque ye berdade...

Pur buolta de 1988 fui feito un çterro a la borda de la scola i siempre se oubiu dezir que era para um campo de la bola mas nunca passou deilhi. Ya tubo balizas de palo i até marcaçones feitas a çatcho mas todo l tiempo lhebou...

Só agora passados más ou menos binte anhos ye que se bei la obra por ampeçada, será que fui para poupar más ua fiesta!?

Assi, más uns cinco anhos, fazam la inauguraçon i l mesmo tiempo comemoran ls binte cinco anhos d'eixistência...

Caça l grilho

2008-07-05T10:02:00.003+01:00

Quando antigamente ls garoticos andaban na rue i anton eram assi algo a dar l streito, lhougo ua pessona más bielha dezie: parece que andas a sartigalhos...

Agora que ya quaije nin sartigalhos se beian, l pessoal tubo que se birar para outro tipo de caça... ls grilhos!

Juntan-se an grupos de três i alhá ban... um çcubre l buraco, outro bota l'auga ne l buraco i l que sobra, fai la spera...

Yê caso para dezir, quando nun hai sartigalhos caçan-se grilhos i muda-se assi tamien l dezideiro passando a ser: parece que andas a grilhos!!!

Pruoba an obras

2008-07-03T09:37:00.003+01:00

An todos ls lhugares hai necessidade de fazer alguas remodelaçones, seian eilhas de raiç ou arranjos urbanísticos.

Desde hai uns anhos acá que ne l lhugar de la Pruôba la política de obras, se assenta na, a la fuorça toda, querer transformar caminos rurales an auto-estradas i ls merendeiros deban ser las staçones de serbiço... nalguns só faltam las portaijes...

I l núcleo urbano? Esse nun fai parte de l lhugar?

Nun bos parece que l nuosso lhugar ya mereciê alguas anterbançones cumo la de l sagrado?

Retrato de Família

2008-06-02T09:43:00.002+01:00

Mas el haberá cousa más guapa que ber ua família toda junta i feliç!!!

Mirai la felicidade destes três...

La cara diç todo.

Spanta paixaros II

2008-05-26T09:23:00.002+01:00

Bisto que nin todo queda bien a la purmeira beç, l mesmo acunteciu neste caso.

L purmeiro spanta paixaros puosto, l spanta paixaros fumador, bisto que staba más ampenhado an botar uas charutadas i cun isso fazer publicidade ls charutos de cuba, do que an spantar ls pardales de las alfaces, zaparciu...

L'amo bendo que ya nun daba randimento i ls paixaros, ou ya l conhecien ou nun fazien causo, cuntinuabam a spenhicar las alfaces.

Cumo podeis ber ne l retrato, la cultura ten aumantado bastante i anton hoube la necessidade de ir l centro d'amprego e requesitar outro spanta paixaros, a ber se ten melhor resultado...

Ua de las cousas que l'amo exigie, i cumo bai a ampeçar l'euro, era que tenie de traier l gorro cun las quelores de l nuosso paiç... i assi ye!

Este apoia la nuossa seleçon, só puode ser buon rapaç.

Ya spantador de paixaros, hummm... nun sei...

Para quien ten ganas de caminar

2008-05-19T09:45:00.003+01:00

Antegrado nas comemoraçones de l Die Mundial de l'Ambiente (5 de Julho), l Município de Miranda de l Douro quiere, más ua beç, dar a çcobrir alguas de las cousas guapas de l Praino.

La partida será die 1 de Junho (Deimindo) pulas 8.30h, l pie de l Posto de Turismo de Miranda de l Douro. Deçde aí fai-se l camino a pie, salindo an direçon l riu Fresno, pul carreiron pedonal até l Barrio de Santa Luzie, seguindo-se por camino até Cércio. Daí sigue-se tamien por camino an direçon a Dues Eigreijas.

A la chegada a la Srª de l Monte hai almuorço para todos ls participantes.

La benida para Miranda ye feita an transporte assegurado pula Câmara.

La moda de l calhamino

2008-05-13T09:29:00.004+01:00

Nua altura an que la gente ampeça a deixar de tener animales, porque ya naide quiere saber de ls trabalhos de la agricultura, ampeçoran a aparecer ls "calhaminos"...

Hai eiqui uns anhos, la gente ampeçou a tirar ls animales mas deixaba siempre un burrico, nin que só fussa para arar la binha, la huorta i poner las batatas, ou anton para apanhar l subsídio i era siempre buono ber andar la gente antretenida a lhebar i a bscar ls burricos l çerrado.

Deçde um anho acá, más ou menos, apareciu la moda de ls "calhaminos" i la fuorça de tração animal fui sendo sustituida!

Agora ye só ber "calhaminos" a passar na rue, nas huortas, na binha, a poner las batatas i outras cousas! Cun tanta zunzideira parece um anchame d'atabanos.

Deiqui a nada inda han-de fazer ua feira de l "calhamino" nas biespras de l Naso i dar um prémio l melhor eisemplar...

Moreira çantenária lhieba ancuntron

2008-05-08T20:55:00.002+01:00

Ne l nuosso lhugar hai uas quantas moreiras i quaije todos nós ya mos ancarrapitemos neilhas, fuossa nas nuossas brincadeiras de garotos ou para apanhar las moras.

Siempre mos lembra da las ber quaije cumo estan, ya quantos anhos estaran eilhi?

Ua deilhas, aqueilha q stá fuora de l sagrado, talbeç seia la más bielha de todas i nunca eilha "pansarie" que agora açpuis de tantos anhos passados, l fuossa passar ua cousa destas...

Ya se chubiu muita gente neilha, ya pregoram alhá muitos papels, la sue slombra ya fui muita beç agradecida, agora lhebar um ancuntron dun trator!!! por essa nun speraba passar!

Essa fui berdade, bós bede que tal fui l'ancuntron que até l'arrincou la casca, botou fuolhas i moras abaixo...

Ya nin las moreiras tenan çcanso!

La nuossa Scola

2008-04-29T11:01:00.006+01:00

An tiempos passados sítio onde quaije todos nós aprandimos a ler i a screber i ganhemos alguns conhecimentos, hoije, local dado a l'abandono...

Quien nun se lembra de ls tiempos de scola! Ye cousa que nun se çquece...

Saudades de mos santar naqueilhas carteiras de madeira, de ls cadernos i de l cheiro a giç, saudades de l recreio, de las trabessuras que se fazien, saudades de l'ampeinho cun que cada classe trazie l sou quintal lhimpo...

Agora tantos anhos passados, i açpuis de mirar pal retrato, çquecemos essas buonas recordaçones i ampeçamos a tener saudades de ber la nuossa scola anteira... sin jinelas partidas nin beirales caídos...

Sendo la scola l sítio onde "ampecemos" a ser homes i mulhieres que somos hoije, será que nun merecie ua pequeinha atançon de las fuorças bibas!? Hai caminos cun menos buracos...

Queda eiqui l zafio...

Curiosidade

2008-04-19T10:02:00.003+01:00

Esta curiosidade, ya ben un die atrasada, mas nunca ye tarde para saber.

Onte fui L Die Anternacional de ls Monumentos i Sítios.

Neste santido, l lhugar de la Pruoba tamien ten ua palabra a dezir. Anton porquei? Dezis bós!

Ye que la Pruoba, ye l lhugar de l destrito cun más cruzeiros!

Nun sabiedes esta!!!

Barbeiro de la Pruoba

2008-04-18T10:01:00.003+01:00

Alguns de nós inda mos lambramos de l Tiu Pellejas, outros talbeç ya nun l tengan conhecido. L Tiu Pellejas fui l barbeiro de la Pruoba durante muitos anhos i çquilou i fizo la barba a muita gente, assi cumo outros barbeiros que alhá habie.

La gente santaba-se naqueilha cadeira de madeira dura cumo ua piedra i nada cunfortable i l barbeiro alhá iba cortando l pelo ou fazendo la barba. Las tejeiras, a las bezes mal aguçadas, arrepiçaban l pelo, i las manos fries a tocar ne l cachaço até fazien saltar.

Ua de las çquiladuras ambantadas pul Tiu Pellejas que nunca chegou a ser dbulgada, fui l pandado de ls pelos de punta i anganhan-se aqueilhes que pensan que esse pandado apareciu hai pouco tiempo.

La Pruoba siempre stubo adelantrada nestas cousas de moda i cumo podeis ber ne l retrato, esse pandado ya era usado na Pruoba hai ya alguns anhos...

Banhos an grupo ne l Picon

2008-04-16T09:52:00.003+01:00

L Picon, hai eiqui uns anhos atrás era un lhugar de culto i muitas pessonas benien a esse lhugar por causa de la sue auga que curaba las maleitas. Lhugar esse que, agora an ruinas, mas mesmo assi inda cuntinua a lhebar alhá gente.

Ls besitantes iban alhá, anchien la pila de auga i chafurgaban-se neilha, mas isto an banhos andebiduales.

Agora, cun la moderneidade de ls nuossos tiempos, anpeçan a aparecer nuobas maneiras de banhos: Ls banhos an grupo.

Cumo ne ls últimos tiempos tenan aparecido alguas pessonas para este tipo de banhos, stá-se a pansar alhargar la pila, ou anton fazer ua nuoba para que se puodan chafurgar todos l mesmo tiempo, ua beç que, na que hai, nun dá muito jeito...

L Spanta Paixaros Fumador

2008-04-14T13:57:00.007+01:00

Quaije an todas las tierras de nomeada hai ua estátua, seia de alguien amportante ou por outro motibo qualquiera.

An Almada tenan l Cristo Rei, an Guimarães l D. Afonso Henriques e na Pruoba... Na Pruoba que tenemos?

Ne l lhugar de la Pruoba tamien tenemos agora ua personaije amportante, L Spanta Paixaros Fumador.

Esta figura fui puosta i feita cun l fim de spantar ls paixaros que se iban a las alfaces de l'huorto a la borda de l'eigreija mas tamien an homenaije a todos ls spanta paixaros que se beian por ende.

Tamien nua altura an que ye pruibido botar uas cigarradas quaije an todos ls sitios, este mono bai contra essas leis ua beç que el tamien las bota, se nó, reparai ne l charutaço que ten na boca...

Será que stá eilhi para spantar ls paixaros que ban a spenhicar las alfaces ou para fazer reclame de ls charutos de Cuba!?

Nuoba ocupaçon

2008-04-07T15:34:00.005+01:00

Cun la chegada de l buono tiempo, ampeçan a salir ls lhagartos pal sol, açpuis de passar l'imbierno arrecadados...
L mesmo se passa cun las pessonas que, mal ben l sol, ponan-se lhougo a la brigada.
Ne l casino, i para melhor cunforto de ls clientes, ya abriu la splanada i este anho cun alguas alteraçones: nun hai aqueilhas ruodas chenas de cimento para pegar ne l guarda-sol, quien quiere slombra ten que pegar nel.
Bai-se alhá drento, trai-se la cadeira pa la rue assi cumo l guarda-chuba, si porque l guarda-sol pesa muito, i quien quiere traier l café tamien pa la rue, ten que pedir la ajuda de alguien para pegar ne l guarda-chuba anquanto l toma.
La melhor ye que la Associaçon de Bendedores de la Pruoba, stá a pansar adaptar este çarbiço a todos ls locales de benda, de modo a baixar la perçantaije de bandoleiros.
Assi, anquanto segura ne l guarda-chuba, ye siempre menos un a star sin fazer nada...

Nuobo çapateiro

2008-04-02T09:38:00.004+01:00

Desde cesteiros, ferreiros, tecedeiras, barbeiros i até çapateiros, todo isto habie na Pruoba, era ua tierra cun muitas artes i ouficios... Cesteiros i tecedeiras inda cuntinua a haber cun maior ou menor atibidade, mas hai, todo l resto ya se acabou.

Dezi alhá que nun era bien buono tener un barbeiro para ir a cortar l pelo ou fazer la barba, ou un çapateiro para amanhar uns çapatos de beç an quando!?

Para cortar l pelo tenemos que ir a la cidade, mas até ye más confortable que antigamente pelo menos nun rinde tanto l tiempo i la cadeira ye más amerosa!

Ne l que diç respeito ls çapateiros la moda ye outra, na falta de quien deia ua puntada ou faga uas cholas podemos siempre fazer cumo l que se bei ne l retrato an riba:

Anroscamos ls çapatos cun fita cola i siempre dura más uns dies, ou semanas, ou até meses...

Mordisquina

2008-03-31T13:54:00.004+01:00

Purmeiro fui la moléstia de l fogareiro, desta beç apareciu outra cousa mala... Ua mordisquina.

La maleita esta ye ua cousa mie ruin, ataca toda la gente, seian nuobos ou bielhos esteian an casa ou ne l meio de la rue.

Las pessonas stan normales i sin más nin menos ampeçan a coçar-se cumo ua cousa tonta, parece cousa de l'outro mundo!

La gente anda zapaçanciada cun la mordisquina esta, nun se sabe d'onde bieno nin quien la truixo mas hai quien pense que apareça de dues maneiras...

Ua ye más frouxa i basta la gente coçar-se cun la mano, más hai outra, essa si ye mie ruin, la gente fica tan zapaçanciada que nun sabe l que fazer que até se rebolcan ne l chano tal ye l desespero... Tenei cautela...

L ferragacho

2008-03-27T14:48:00.006Z

A las bezes hai cousas que mos dan cabo de la cabeça, i por más buoltas que deia-mos quedamos siempre eigual... só porque somos teimosos.

Ne l die da Páscoa, ne l Naso, dou-se ua cousa angraçada: un pinchabeilho, ou ua maquineta daqueilhas de poner ls precios nas cousas de l soto, puso quaije toda gente l redor deilha.

Naide era capaç de la poner a funcionar por muito que sferrunchasan neilha.

Bós mirai cun que cudicia andaba aquel pobo... si l doran bien buoltas... tubiran de la cansar para la poner a funcionar!!!

Quien nun sabe, ye cumo quien nun bei...

Tamien assi fui ua maneira d'antretener la gente más un cachico... uns a sferrunchar i outros a mirar...

Moda Calças Caídas 2008

2008-03-19T09:44:00.004Z

Más ua grande atibidade acunteciu na nuossa tierra nos últimos tiempos.

Un de ls modelos más conhecidos de l praino passou pula Pruoba para dar a conhecer la sue más recente criaçon de moda.

Calças l fundo de l culo.

Este nuobo estilo de rue ten cumo prancipal característica andar cun las calças pinduradas l fundo de l culo i cun las nalgas a la muostra, será para desairar!!!

La rapaza que stá l lhado parece star a gostar de l que bei...

Será que la moda pega!?

L'Albarda

2008-03-17T09:56:00.003Z

Agora ya nun se usa muito, mas antigamente ne ls dies de feira, i cumo nun habie outro meio de transporte, la giente iba de burro.

Scolhien-se las alforjas ou la manta más guapa para poner an riba de l burro, nun só para ornamentar mas eigualmente para nun sujar la roupa i alhá iban ls animales todos pimpones transportando ls sous amos.

Habie tamien, quien l punissa ua albarda para nun se ferir tanto ne l culo ne l spinaço de l burro, mas serien só las pessonas más abastadas.

Hoije traiémos eiqui un retrato d'un home a poner la albarda an riba de l burro, mas reparai que: ou el nun sabe l que ye un burro, ou l que ye ua albarda! Bós nun bedes que até puso la albarda birada l cuntrário... ou anton çqueciu-se de birar l burro...

An que starie a pansar!!!

La comida mirandesa

2008-03-13T09:35:00.006Z

Toda la gente diç que nun hai comida cumo la de la Tierra de Miranda, seia an doces ou noutra cousa qualquiera.

Tenemos la posta mirandesa an purmeiro lhugar, mas tamien nun nos podemos çquecer de l canhono assadico na brasa ou até an caldeirada, nin de l nuosso fumeiro que ten ne l butielho cun cascas la sue prancipal dibulgaçon.

No que toca a las cousas doces, hai la bolha doce mirandesa, l folar, çodos, roscos, entre outros sin çquecer tamien l nuosso bino.

Se só d'oubir falar nestas cousas buonas ya quedestes cun cara de fome, mirai cumo quedóran estes quando las purbóran...

Nuoba maneira de beilar

2008-03-11T10:38:00.003Z

Hai muita maneira de beilar, seia solo ou acumpanhado i tamien alguns tipos de beiladuro.

Hai bailes de ruoda, repasseados, a pares i outros más, mas siempre homes e mulhieres aparelhados.

Cumo podeis ber ne l retrato, ne ls últimos tiempos tenan aparecido uas cousas que nun las antandemos mie bien... homes que beilan cun homes!!!

Se las pessonas cun más idade bissan ua cousa destas, dezien lhougo: "isto nun puode ser, l mundo stá perdido... homes beilan cun homes i inda pur riba apegados un por trás de l'outro... you nun sei onde iremos a parar..."

Diç-se tamien, que l dinheiro nun trai la felicidade, mesmo que ajude un cachico... mas tamien nun ye preciso, mirai la cara deste rapaç só porque ten un bolho i ua çarbeija na mano...

Besinos quaije mielgos

2008-03-10T10:30:00.005Z

Hoube ua altura an que se oubie muito falar de "sósias" que an mirandés nun ten traduçon, pansamos nós, mas que quier dezir pessonas parecidas.

Ne l lhugar de la pruoba tamien hai dessas moderneinades. Mirai só para isto:

Ls casacos son quaije iguales, las gorras tamien, ponan l cascol a meias, cumo só tenan ua buida tamien deban buer de la mesma, i inda cumo se nun chegasse isto... nun ye que son besinos!

El si hai cada cousa! Çcobri las diferencias...

Agradecimento

2008-03-10T10:08:00.004Z

"la boç de l pobo" ben hoije fazer l que habie de tener feito ya alguns dies.

Benimos agradecer a la nuossa amiga, que mesmo stando algo longe, nos botou ua mano(ou las dues) e nos puso acá ua moda original de ls "trasga" para que quien nos besite la puoda scuitar.

Cumo se diç na nuossa tierra quando se quier agradecer a alguien: "Dius te dé un buono moço"

Todo se perde

2008-03-04T10:29:00.003Z

Todo se perde...

Las tradiçones, usos i costumes i até berdadeiras pieças de "arte tradicional", feitas a mano, an que ls nuossos antepassados ponien algua de la sue cudicia.

Habie ciguonhales, arados i rastros de animales i las tan conhecidas canhiças que cada beç hai menos, bitimas de la modernidade i comodidade de todos nós.

Isto todo, fazie de l praino ua berdadeira çposiçon natural i l bibo. Iba-se pul termo, bien-se ls ciguonhales ne l meio de las huortas, las bacas unhidas i las canhiças a tapar las ruodeiras dessas mesmas huortas.

Hoije todo mudou, motores de rega i tratores a fazer zumbideiras i canhiças de Mobeiros an fierro i mal antrejeitadas...

Ls quatro pimpones

2008-03-03T09:38:00.002Z

Cun un retrato destes, palabras para quei...

L "Noddy" Mirandês

2008-03-01T10:16:00.004Z

Assi cumo l "Noddy" anfantil fai parte de l'imaginairo de muitos garotos, mirando ls sous monicacos i cantando las sues modas, tamien nós, ya más adultos tenemos presente l nuosso "Noddy" Mirandês.

L "Noddy" Mirandês ye ua personaije bardadeira conhecida an todo l praino mirandês i quaije por todo l paiç. Pequeinho de tamanho mas mie grande an buona disposiçon i siempre pronto a fazer ua trabessura ls más çcuidados.

"la boç de l pobo" manda deste modo um grande abraço, mas bien apertado, a este grande amigo i cumpanheiro...

La Moléstia de l Fogareiro

2008-02-27T10:26:00.005Z

Abiso Amportante:

Abisan-se todas las pessonas que ban l casino(café de la "associaçon"), que fui ancuntrado nesse local un birus de ua maleita mie perigosa. Esse birus ye mie ruin i hai que tener muita cautela pus ataca pula calhada i quando nos aporcatamos ya fizo l'eifeito.

Prancipales sintomas: muita perguiça i de seguida suonho fuorte.

Probables causas: la calantura de l fogareiro.

Esta maleita nun ten cura i fui cunsiderada cumo la praga de l'imbierno.

Bede ne ls retratos cumo quédan...

"la boç de l pobo" tamien ten l deber de prebenir...

Árbre Postaleira

2008-02-26T09:42:00.003Z

Toda la gente stá acostumbrada a que las árbres dêiam l sou fruto, seian bolhacas, belhotas ou maçanas.

Hai eiqui uns meses atrás, nun sabemos se motibado por estas cousas de l buraco de l'ozono i de l calcimento global, apareciu ua nuoba árbre na pruoba.

Naciu ne l meio de l camino, ten fuolhas de carbalheira mas nun dá bolhacas nin belhotas, (si porque hai un tipo de carbalho que dá belhotas...) i an beç de tener esse tipo de frutos, ten postales alhá culgados!!!

Iá sabemos que stais para ende a pansar que isto ye todo ua aldrabada, mas para que bêiades que ye bardade, "la boç de l pobo" tirou un retrato para bos mostrar...

Las pessonas bendo que la árbre daba mesmo postales, puniran-le l nome de Árbre Postaleira.

Cousa nunca bista...

Pruoba, tierra de gaitas i gueiteiros

2008-02-22T17:07:00.003Z

La Pruoba siempre fui ua tierra de muitas i buonas tradiçones.

Habiê dançadores, quelóquios, matchorra i gueiteiros de grande nomeada, a quien "la boç de l pobo" quier agradecer pul cuntributo que doram a la cultura mirandesa.

Gueiteros i dançadores cuntinua a haber ambora cun pouca atibidade ua beç que só se ajuntam na fiesta de l fim de berano. Mas ye de loubar mesmo essa pouca atibidade i que nunca se perda essa pouca.

Feliçmente que nos últimos tiêmpos tenan aparecido alguas pessonas a mostrar anteresse an aprander a tocar la gaita, a essas pessonas eiqui deixamos un catchico de la nuossa fuorça para seguir an frente.

Eiqui bos deixamos l'eisemplo de un, i raparai ne l pormenor: cumo stá a tocar la gaita na rue nun se çqueciu de l jaleco...

L scarabeilho i la sue bola

2008-02-21T10:29:00.006Z

Todos bós sabeis l que ye un scarabeilho i quaije de certeza que ia tamien l bistes a rodar la sue bola.

Desde siempre que las maneiras i la parecência de ls scarabeilhos tchamoran la atançon de l'home.

L scarabeilho pon ls uobos na tierra i anrosca-los nua pequeinha bola de stierco que fai rebolhar, ampurrando-la cun las patas traseiras, para un buraco por el feito i onde ls uobos son tchucados pul calor de l sol.

Para ls antigos Eigípcios, este cumportamento de l'animal era mie parecido l mobimento de l sol ne l ciêlo. L scarabeilho, era ua dbindade destacada i cunstituie un símbolo de la longebidade, de la imortalidade ou de l sol. Bie-se neste animal la representaçon de la ressureiçon, por el simbolizar la bola an que stão ancerrados las semientes de la bida.

I esta!!! "la boç de l pobo" tamien cultiba...

Automoble que anculhiu

2008-02-20T11:05:00.003Z

L que "la boç de l pobo" bos trai eiqui hoije, ye ua cousa nunca bista.

Todos nós, sin dúbida ningua, pansabamos que ls automobles pudien abariar, anferrujar, quedar cun ua ruoda furada ou até mesmo andar de ampurron! Mas nunca mos passarie pul pansamento que pudierien anculhir...

Na Pruoba, lhugar onde todo se passa i puode acuntecer, fui isso mesmo l que acunteciu.

Ua rapaza, pansando que lhabando l'automoble cun auga caliente puodierie tirar melhor l puolo, parece que l resultado nun fui l que esperaba: L'automoble anculhiu.

Mirai cumo quedou!!!

Çporto - Tenemos Corredor

2008-02-19T09:43:00.006Z

Nua tierra onde hoije an die las únicas atibidades çportibas praticadas a l'aire libre son andar de burro, trator i automoble, para nun falar de l lhebantamento de copos i lhançamento de cartas pa la mesa, eis que aparece un bardadeiro çportista.

Ne l die 18 de Fabreiro de l presente anho, Luis Diogo "Obikuelo" curriu ne l Corta-Mato Escolar, a nibel distrital, i quedou an sigundo lhugar.

La corrida essa, fui an Bragancia i sigundo l próprio só nun quedou an purmeiro porque arrebalou.

Parabienes.

Cumo ya dezie Eiduardo:

"Ai que fazer çporto..."

Formaçon Familiar

2008-02-18T11:04:00.001Z

Nun sei se ya sabiedes, mas n'l passado mês de junho n'l lhugar de la Pruoba, hoube ua formaçon que se tchamaba "Formaçon Familiar".

Esta formaçon tenie cumo prancipal funçon ansinar ls pais, (só pais mesmo, nó mais) a tomar cuonta de ls ninos. Arrolhá-los, mudar las fraldas, lhabá-los (nin que fuossa na ribeira) i tamien dar-les a comer...

Essa formaçon, i cumo todas las outras, tenie dues partes: la parte falada i la outra onde se fazien las cousas, mas só se fizo la sigunda. Parte essa que tubo lhugar n'l Naso l die de San Juan.

"la boç de l pobo", mas ua beç tubo conhecimento de todo...

L Papon

2008-02-17T20:23:00.000Z

"la boç de l pobo" ben desta beç para bos falar de "L papon".

Ora, quaije de certeza que todos bós bos lambrais de quando erades pequeinhos i de ls buossos pais bos assustar cun la personaije assustadora que era l papon.

Quantas bezes oubiriedes isto:

- se nun paras quieto i nun te portas bien, ben aí l papon i lhieba-te drento de l saco

- i l que ye isso de l papon?

- ye un miedo que trai un saco mie grande onde mete alhá ls garotos malos que nun fazam l que l mandan.

I nós cuitadicos, cu'l miedo de l bitcho esse alhá assossegabamos.

Ora esse miedo, que a todos nós atormantou, bieno de passaije a la pruoba mas este ia nun era cumo ls de dantes, an beç de traier el l saco, benie alhá drento!!!

"la boç de l pobo" estaba alhá...

L die d'antruido

2008-02-16T18:45:00.001Z

Hai uns anhos atrás, l die d'antruido na Pruoba era de muita nomeada, die de grande mobimentaçon l redor de l desfile que se fazie nesse mesmo die a la nuite n´l salon de la casa de l pobo.
Este anho l que parece nun se fizo, l que beno a tornar-se motibo de grande admiraçon, pu'la negatiba, de las pessonas mas bielhas que bien nesse catchico de tiempo bien passado ua maneira de se antretener.
Inda assi, hoube quien quejisa fazer cun que l'antruido nun se perdisa e furan a ganhar l purmeiro lhugar a la tierra bezina, benindo a fazer l'ancerramento i l'anterro de l'antruido a la pruoba cun grande ampeinho.
Parabienes a essa rapaziada.

Bien Benidos

2008-02-16T16:01:00.001Z

Buonas tardes!

Bien Benidos seiades a "la boç de l pobo".

Cun la criaçon deste blogue quiere-se dar a conhecer que na Pruoba tamien ai bida, apesar de nun parecer.

Eiqui se bai a dbulgar alguas de las cousas angraciadas que ban acuntecendo na tierra de ls "mata-cristos", çcubertas que bos ban a deixar çarapantados.

Saudaçones mirandesas